ХЯТАДУУД МОНГОЛ МАЛЧДЫГ ЗОДОЖ, 270 ГАРУЙ МАЛЫГ НЬ БЭЛЧЭЭР НУТАГТАЙ НЬ БУЛААВ

2017-12-03 SMC Мэдээ 77

У.УРГАМАЛ: БИ БАЙЛДНА, АЙХГҮЙ! ӨМӨЗО-ы Ордос хотын Хангин хошууны Морин голоор нутагтай Уул, Алтанхуар, Ургамал нарын малчид малаа хариулах эрхгүй, амьдрах аргагүй болж, шударга бүхнээс тусламж хүсэж, дээр тэнгэр хол, дор газар хатуу гэгч болоод шаналан зовж явна. Ургамал бүсгүйн аав нь Уул, ээж нь Алтанхуар юм.

12-р сарын 3-ны өдөр 10 гаруй балмад хятадууд дайран ирж, ямаа голдуу 270 гаруй толгой малыг нь тууж явж, эздийг нь зодож нүджээ. Ирсэн хятадын нэг нь “Энэ бол та нарын бэлчээр биш, улсын газар” гэж хашгиран дайрч байв. Харин малчид “Бидний хэдэн үеэрээ суусан нутаг” гэж хэлж байлаа.

Энэ явдлын эх улбаа нь 2015 онд холбогдно. Тэр оны 7-р сард төрийн байгууллагын хүмүүс ирж, та нарын нутаг бол улсынх, тиймээс энд мал адгуулж болохгүй гэж мэдэгдсэн. Малчид эс зөвшөөрөхөд, тэд янз бүрээр танхайрч дарамталж байжээ. Шударга ёсыг эрхэмлэдэг малчид заалдан хоёр жил тэмцсэний эцэст, Өвөр Монголын Ардын дээд шүүх тэдний зөв гэж үзжээ.

2017 оны 9-р сард улсын байгуулагын ажилчид ахин малчидтай газар булаалдаж эхэлжээ. Маргаан зөрчил үргэлжилсээр, сүүлдээ малчдын малыг үл мэдэгдэх газар луу туун авч явсан байна. Малаа булаалгасан малчид 158 497 234 56 гэсэн утас руу залган, тусламжийн гараа сунгахыг хүсэж байна.

Манай сайтаас малчин Ургамалтай холбогдлоо.

-Энэ нутаг бэлчээр бол бидний олон үеэрээ суусан, төрсөн нутаг ус минь билээ. Бидний энэ нутагт цагаан ноолуурт өндөр үр ашигтай үрийн мал өсгөх “Мүлинхэ” гэдэг компани байрлах болсон цаг бий, аав ээж тэр компанид ажиллаж байсан. Компани болон хувь хүмүүс малаа хариулдаг хамтын бэлчээр маягтай нэг хэсэг байсан. Гэхдээ улсын газар гэж яригддаггүй байв.

“Мүлинхэ” компани дампуурахад бид малыг нь авсан. Хуулийн дагуу бэлчээр нутгийг малчин ард бидний мэдэлд бүрэн дайчилж өгсөн. Холбогдох хамаг бичиг баримт нь бидэнд бий.

Гэтэл 2015 оны 3-р сард Тариалан, МАА-н товчооны дорхи нэг шинэ байгууллагынхан газрыг маань улсын газар гэж булаалдах болсон. Тэр оны 7-р сарын 31-нд тэд Улсын газар шорооны хэрэгжилтийн дэвтэр гэж гаргаж ирж, бүр ч их булаалдсан. Хэнээс яаж зөвшөөрөл авсан нь тодорхойгүй. Бид 15 оны 9-р сараас Ордос хотын Ардын дунд шатны шүүхэд хандан заргалдсан.

Уйгагүй хөөцөлдөж тэмцэлдсэний эцэст, 2016 оны 12-р сард тэр шүүхээс газар булаах гэсэн хүмүүсийн бичиг баримтыг хүчингүй болгосон. Тэд давж заалдан түвэг чирэгдэл учруулахад, энэ оны 7-р сард Өвөр Монголын Ардын дээд шүүх дунд шатны шүүхийн шийдвэрийг хэвээр үлдээн баталгаажуулсан.

Ингээд санаа амарч байж байтал, 11-р сарын 29-нд хэсэг хүн ирж, Тогтмол хөрөнгө данслах дэвтэр гаргаж ирж, газар булаалдав. Тэдний үзүүлсэн зурагт манай гэрийг дугуйлаад, тойрсон бүх газрыг авна гэж зурсан байна. 30-ны өдөр манай худгийг эвдэж бөглөсөн. Засгийн ордны явуулсан нохойнууд эрээ цээргүй дээрэм хийж байна. Энэ бол танай биш, улсын газар гэж байсан.

Шүүхийн шийдвэрийг тоодоггүй энэ хүмүүсийг хаана хэлэхээ мэдэхээ болилоо. Хангины засгийн ордон дээрмийн төр боллоо. Амьдрах аргагүй болж, амь насаа алдах гэж байна, монголчууд. Бүх дэлхийд монголчуудын хөөрхийлөлтэй байдлыг таниулах хэрэгтэй. Би монгол дунд сургуульд 25 жил ажиласан багш хүн. Сургуулиас намайг буруутгаж байна.

3-ны өдөр бидний малыг туугаад явсан. Бид байлдаж цохилцоод дийлсэнгүй. Улсын байгууллага, дарга дээрэмчин болж байна. Үнэнийг хэлэхээр шоронд хийдэг. 2015 оны 9-р сард сурвалжлагч ирж надаас юм асуусан. Тэгэхэд Америкийн сэтгүүлчид яриа өглөө гэж намайг 7 хоног хорьж шийтгэсэн. Хятадын сурвалжлагч асуухгүй юм чинь, Америкийн сэтгүүлчид хэлэхгүй яах юм. Улсын нутаг бэлчээр болгоход зөвшилцөх, хохиролгүй болгох ёстой гэж хуулинд заасан байгаа. Гэтэл шууд төрөөс дээрэм хийж байна.

Аав ээжийн алгын чинээ газрыг хамгаалж чадахгүй байгаад яах юм билээ. Энэ бие хохирох хамаагүй. Өвөг дээдсийн маань хүүр онгон энд байна. Гэтэл биднийг улсын газрыг булаасан гэж гүтгэж байна. Би айхгүй. Байлдвал байлдна. Би тэмцэхгүй бол үр хүүхэд минь үеийн үед хятадуудад дарлагдна. Тэмцнэ гэж ярилаа.